Chocoholic-kitchen: 糖水

顯示具有糖水標籤的文章。顯示所有文章

2012年12月10日星期一

木瓜雪耳糖水

材料：
木瓜
雪耳
南北杏
冰糖
清水

屬於簡單易做嘅中式糖水之一。木瓜去皮去籽，洗淨切件 (最好揀啲比較熟嘅，除咗因為顏色紅啲之外，仲可以令到啲糖水甜啲 )；雪耳浸熱水，待發脹之後，剪去底部木頭部份，洗淨後汆水備用。煲滾水後，將所有材料加入清水中，再次煲滾後，就可以番落個真空煲度，食之前再煲一煲就掂哂！

好好味，好滋潤呀。

Source: http://blog.yahoo.com/_EZXYU2MODYMADQBDU3JSDYNTL4/articles/66657/category/%E5%B9%B8%E7%A6%8F%E7%94%9C%E5%93%81%E7%AF%87

芝麻糊

材料：
黑芝麻
白芝麻
米
片糖
清水

先用白鑊將黑芝麻同白芝麻炒香。

將芝麻同米一齊放落攪拌機度打碎 (米要預先用水浸約 30分鐘)。

將已打成粉狀嘅材料倒入煲內，加入清水，用中火煲滾 (如果你想啲芝麻糊食落幼滑啲，咁你就要隔渣啦，而我就無隔渣嘅，因為一來可以高纖啲，二來唔想咁麻煩)。記得邊煮邊攪拌，因為好容易黏底，當見到開始煲滾時，加入已經煲溶咗嘅片糖水，再煲到大滾就得啦。

一碗熱辣辣、香噴噴嘅芝麻糊就係咁簡單整到啦！

Source: http://blog.yahoo.com/_EZXYU2MODYMADQBDU3JSDYNTL4/articles/66706/category/%E5%B9%B8%E7%A6%8F%E7%94%9C%E5%93%81%E7%AF%87

紫心蕃薯湯水

材料：
紫心蕃薯
薑
片糖

蕃薯去皮洗淨，然後切粒；薑切片。水滾後，將蕃薯同薑一齊落煲，煲到差唔多腍時就加埋片糖落去，再煲至片糖完全溶解就 OK。冬天食呢個糖水就最正，熱辣辣、暖 " 笠笠 "，食落好舒服。

影相因為有閃光燈，所以影出嚟啲色好靚，之前喺個煲度果陣就好恐怖，" 黑抆抆 "，成煲墨汁咁。

呢個係一個由材料到做法都非常簡單快趣嘅糖水，因為蕃薯好快腍，所以由洗洗切切開始到寫完呢篇 blog 都唔駛半個鐘，我依家都係一邊寫、一邊食咋！真係懶人菜中嘅表表者。

白果薏米腐竹糖水

材料：
白果
薏米
腐竹
冰糖
雞蛋

- 白果先剝殼，然後去衣、去芯；薏米洗淨後用水浸約半個鐘；腐竹洗乾淨，用水
浸軟。

- 煲滾水後，先放白果同薏米煲一陣間。
- 之後放埋浸軟咗嘅腐竹，再煲多一陣，見腐竹滾爛後，就可以放番落真空煲度。

- 到食之前半個鐘拎番出嚟煲番滾，然後加冰糖。

- 當所有冰糖都煮溶哂時，就可以打雞蛋入糖水度，蛋煮熟後就攪掂。

一個簡單易做又好味嘅湯水，原來都有食療價值。我睇番中醫師何樹勛博士寫嘅《保健湯水》都有教煲呢個湯水，可以治哮喘、利小便、去水腫、清熱除痰，生薏米仲可以抗癌療癌 o添！不過冬天都係唔好飲太多，一來糖水本身較寒涼，二來因為去水利尿，冬天就要成日去廁所！

椰汁紫米露

材料：
黑糯米
罐頭粟米
冰糖
椰漿
粟粉

- 黑糯米洗乾淨，用清水浸一個鐘。

- 煲滾水，將黑糯米放入，煲約 15 分鐘後就可以放番入個真空煲度。

- 約 3個鐘後，拎番出嚟煲番熱。

- 另外，將冰糖加水煲溶成糖水，然後倒入紫米露裡面一齊煲滾。

- 與此同時，用椰漿將粟粉拌勻，等到紫米露煲番滾之後就倒埋入去一齊煲，記得
邊煲邊攪拌，以免粟粉受熱凝固結塊，再次煲滾就有糖水食喇！。

Source: http://blog.yahoo.com/_EZXYU2MODYMADQBDU3JSDYNTL4/articles/66959/category/%E5%B9%B8%E7%A6%8F%E7%94%9C%E5%93%81%E7%AF%87

麥米番薯糖水

材料：
麥米
番薯
薑
片糖

- 麥米洗淨，用水浸過夜。

- 番薯刨皮後切件或大粒。
- 薑切厚片，備用。

- 除片糖外，將所有材料放入煲內煲滾，之後轉用中細火煲約 15 分鐘，然後校
番大火再煲幾分鐘就放人真空煲內。

- 約 2 - 3 個鐘後，將番薯放上火煲番滾。與此同時，另外再煲滾水，放片糖落去
煮溶成糖水。

- 將糖水倒入番薯裡面，拌勻，再次煲番滾就可以食喇！

Notes:
- 刨皮後嘅番薯要浸水，防止氧化變色。

- 麥米比較煙韌，所以用水浸過夜，等佢吸足夠水份就會無咁硬。

蓮子百合紅豆沙 ( 日本、新會 crossover 版)

早前喺雪櫃度搵嘢時，摷吓摷吓，原來發覺之前 Louisa 喺日本買俾我果包金時紅豆都唔記得食，所以今日就用佢嚟煲紅豆沙。

我習慣每次整任何豆類之前，都會前一晚先洗乾淨，然後用水浸過夜，噚晚我就將碗紅豆放咗入個微波爐入面，今朝打開個爐時，嘩，真係香都不得了！日本金時紅豆真係非同凡響，淨係浸水都已經咁香，整出嚟嘅紅豆沙實好正呀！所以我都無虧待佢 o架，加咗塊正新會陳皮落去一齊煲 ( 係媽咪擺喺灶底，收埋嚟用 o架，不過我屋企都仲有唔少，因為媽咪係新會人，所以佢果邊所有親戚都係新會人，以前好易攞到，所以儲落好多呢！ ) ，真係唔得掂，香到呢 ……