咖喱豬皮魚蛋

雖然叫做咖喱豬皮魚蛋但係又點少得蘿蔔呢？煮到入哂味嘅蘿蔔，仲好食過個兩樣主打材料 o添！本來諗住淨係買豬皮嘅，點知去到豆腐檔，見到任揀 $10 份淨豬皮、豬皮魷魚、淨魷魚、魷魚加柏葉，有得咁揀，咁就梗係揀豬皮魷魚啦，多一款食材嘛！所以就變成 "咖喱蘿蔔豬皮魚蛋魷魚" 喇！嘩，好鬼死長呀，一口氣都讀唔哂。

材料：
白蘿蔔
浸發豬皮
炸魚蛋
水浸魷魚
蒜茸

調味料：
咖喱醬
沙茶醬
玫瑰露
鹽
糖

- 先將豬皮、魷魚、魚蛋沖洗乾淨、切件，然後放入加有白醋同酒嘅滾水內汆水，
瀝乾備用。

- 蘿蔔切去頭、尾，刨皮後切細件。
- 燒熱油，先爆香蒜茸，之後將咖喱醬同沙茶醬加入一齊爆香，灒酒。
- 加入蘿蔔，兜勻，加入適量清水。
- 當咖喱汁煮番滾後，就落埋其他材料一齊煮，加鹽、糖調味。
- 當煮到蘿蔔腍身就攪掂，可以上碟。

加多咗沙茶醬落去，味道真係有啲似出邊果啲咖喱魚蛋咁味，惹味好多。呢個小食又好味、又簡單、又快手，抵呀！

P.S. 好多時喺豆腐檔買返嚟嘅嘢都會好油，唔單只係今日嘅豬皮同魷魚，就連平時買嘅豆腐都係一樣有油，初時都真係唔係好明點解會咁，後尾卒之俾我諗到，係因為檔口阿姐唔會成日洗手，摸過哂啲炸魚蛋、豆腐卜、麵筋之類油炸食物，跟住又摸豆腐、豬皮、雪菜 …… ，咪攪到所有嘢都肥喱囉！